Афіцыйныя друкаваныя выданні

Вярхоўнага Суда Рэспублікі Беларусь

Архiў нумароў

Чытайце ў часопісе "Судовы веснiк". № 4/2021

Для прагляду неабходна аўтарызавацца або зарэгістравацца

У верасні 2021 г. Пленум Вярхоўнага Суда Рэспублікі Беларусь абмеркаваў вынікі абагульнення практыкі разгляду судамі спраў пра матэрыяльную адказнасць работнікаў за ўрон, прычынены наймальніку пры выкананні працоўных абавязкаў. Таксама Пленум абмеркаваў практыку па крымінальных справах пра злачынствы супраць інтарэсаў службы, выклаў дзве раней прынятыя пастановы ў новай рэдакцыі. З асноўнымі тлумачэннямі і рэкамендацыямі, дадзенымі судам у прынятых па выніках пасяджэння Пленума пастановах, знаёмяць матэрыялы рубрыкі «На тэму Пленума». 

У рубрыцы “Абмяркоўваем” суддзя Вярхоўнага Суда Л. Калеснікава разглядае асаблівасці прымірэння ў судаводстве па грамадзянскіх і эканамічных справах і акрэслівае перспектывы замацавання інстытута прымірэння ў законапраекце аб грамадзянскім судаводстве. Аўтар таксама фармулюе пазіцыі аб мажлівасці нарматыўнага замацавання прымірэння па справах, якія ўзнікаюць з адміністрацыйных і іншых публічных праваадносінаў.

У рубрыцы “Судовая практыка” акрамя традыцыйнай падборкі выманняў з судовых пастаноў прадстаўлены артыкул суддзі Вярхоўнага Суда Ю. Руткоўскага аб асаблівасцях разгляду крымінальных спраў у адносінах да абвінавачаных, з якімі заключана дасудовае пагадненне аб супрацоўніцтве. У матэрыяле прыводзяцца найбольш тыповыя недахопы, выяўленыя ў дзейнасці органаў папярэдняга расследавання, пракуратуры, судоў, падымаюцца асобныя праблемы прымянення названага інстытута на практыцы.

У рубрыцы “Праблемы, меркаванні, прапановы” ў публікацыі суддзі Вярхоўнага Суда Р. Філіпчык звернута ўвага на падставы прызнання судом працоўнага дагавора нядзеючым, прыведзены прыклады судовых спраў, якія ілюструюць падыходы судоў да разгляду спрэчак аб несапраўднасці працоўных дагавораў і іх асобных умоў.

Навуковая публікацыя к.ю.н., дацэнта Р. Ключко ў суаўтарстве з расійскім навукоўцам, к.ю.н. В. Сямыкінай прысвечана даследаванню міжнароднага вопыту крымінальна-прававой аховы персанальных дадзеных як інфармацыі абмежаванага доступу. Аўтары выяўляюць заканамернасці, якія датычацца ўстанаўлення адказнасці за незаконнае ўмяшанне ў прыватнае жыццё, у тым ліку звязанае з парушэннямі заканадаўства аб ахове персанальных дадзеных.